Full Lyrics
In Mariam vitæ viam
Matrem vere viventium
Pie venit Qui redemit
Peccata delinquentium;
Gressum cepit, cum concepit,
Maria multum properans,
Visitavit, confortavit
Elizabeth compatiens;
Salutatur inflammatur
Elizabeth et Filius,
Inaudita fiunt ita
De dono Sancti Spiritus;
Impregnata, gravidata,
Mater olim sterilis,
Infans datus nondum natus
Exultat Christo iubilis.
Servit maior, gaudet minor,
Maria fert solatium
Visitatis, præparatis
Ad spiritum propheticum.
Præcursorem et doctorem
Maria plebi indicat,
Qui Rectorem, Purgatorem
Digito mundi nuntiat.
Leva plebem, duc ad Regem
Maria cunctos visitans,
Ut salvetur et lætetur
Cum tu sis mater medians.
Honor Deo Vivo, Vero,
Per infinita sæcula,
Qui nos regat et protegat
Materna per oracula. Amen.
