Full Lyrics
Festum nunc celebre magnaque gaudia
compellunt animos carmina promere
cum Christus solium scandit ad arduum
cælorum pius arbiter.
Conscendit jubilans lætus ad æthera
Sanctorum populus prædicat inclitum
Concinit pariter Angelicus chorus
Victoris boni gloriam.
Qui scandens superos, vincula vinxerat,
Donans terrigenis munera plurima
Districtus rediet arbiter omnium,
Qui mitis modo transiit.
Oramus Domine, Conditor inclite,
Devotos famulos respice, protege:
Ne nos livor edax dæmonis obruat,
Demergat vel inferos
Ut cum flammivoma nube reverteris,
Occulta hominum pandere judicans:
Ne des supplicia horrida noxiis:
Sed justis bona præmia
Præsta hoc Genitor optime, maxime
Hoc tu Nate Dei: & bone Spiritus,
Regnans perpetuo fulgida Trinitas
Per cuncta pie sæcula. Amen.
