Full Lyrics
In ehren lieb ich einen held.
Ihm liebs zu thun will ich mich stets befleissen.
Darumb mich jetzt nichts anders quelt,
dann daß ich ihm mein lieb nit kan beweisen.
Die gunst so ich groß zu im trag,
muß ich inn mir mit schmertzen hoch verbeissen.
Ewig weich ich von ihm nit ab.
Ehe wolt ich mich zu stücken lassen reissen.
All falsche reden acht ich nit,
man schend in gleich oder man thu in preisen.
So ists mir eins dann man hiemit,
sein lob und ehr bey mir nit kan beschmeissen.
Gott geh daß er auch bstendig bleib,
gleich wie ein Felß ja Stahl und hartes Eysen.
So lang biß ich sein ehelich Weib, von Jederman,
mit Ehr und Recht werd heissen.
