Full Lyrics
Flemus extremos hominum labores,
Flemus in finem properantis aevi
Funera, et jam jam quatienda saevo
Regna tumultu.
Ultima en orbem lacerant ruentem
Fata, quae nostri tripodes canebant.
Aemulus Christi populos et arces
Obsidet armis.
Heu quis in sanam rabiem tyranni,
Quis truces bello fugiat cohortes?
Nudus hinc illinc furit, et per urbes
Saeviat ensis.
Sed quid hos demens agitas furores?
Arma quid divis inimica versas?
Non ruent ullis agitata bellis
Castra piorum.
Regiam Christi bene firma cautes
Sustinet, non has metuit procellas,
Non timet, quamquam cumulata plenis
Fulmina nimbis.
Cymba quam pontus zephyrique jactant,
fluctuat, sed non superanda fluctus est.
Quo ruat casu pelagi potentem
Nacta magistrum?
State, nil Christi soboles, timendum,
Author ad pugnas Deus est et idem
Militi fesso meritos in astris
Reddet honores.
