Full Lyrics
Cælitum festum merito colendum
laudibus cælum repleatque terram,
quos Dei nostros pietas tuentes
mittit Olympo.
Angeli sancti, proceres superni,
seduli et primi Domini ministri,
principes magni populi ducesque
valde potentes.
Quos poli magno prœlio superbis
angelis victis barathrumque missis
patriæ cæli Dominus locavit
arce perenni.
O Pater clemens precibus Tuorum,
quos celebramus, rege nos et auge,
quo Deum verum colat orbis omnis
laude fideli.
Solis abscessus tenebras reduxit,
nunc, Pater, nos irradias, benigne,
luce qui fulva foves angelorum
agmina sancta.
Laus Tibi Patri, decus atque Nato,
Flamini Sancto parilis potestas,
cuncta qui summa pietate regnas
omne per ævum. ℟ Amen.
