Full Lyrics
1. Aures ad nostras Deitatis preces.
Deus, inclina pietate sola:
supplicum vota suscipe, precamur,
famuli tui.
2. Respice clemens solio de sancto
vultu sereno,lampadas illustra
lumine tuo, tenebras depelle
pectore nostro.
3. Crimina laxa pietate multa.
Ablue sordes, vincula disrumple,
parce peccatis, releva jacentes
dextera tua.
4. Te sine tetro mergimur profundo,
labimur alta sceleris sub unda,
brachio tuo trahimur ad clara
sidera caeli.
5. Christe, lux vera, bonitas et vita,
gaudium mundi, pietas immensa,
qui nos a morte roseo salvasti
sanguine tuo.
6. Insere tuum petimus amorem
mentibus nostris, fidei refunde
lumen aeternum caritatis auge
dilectionem.
7. Tu nobis dona fontem lachrymarum
ieiuniorum fortia ministra
vitia carnis millia retunde
framea tua.
8. Procul a nobis perfidus absistat
Satan, a tuis viribus confractus
sanctus assistat Spiritus a tua
sede dimissus.
