Full Lyrics
Bytuene Mershe ant Averil
When spray biginneth to spring,
The lutel foul hath hire wyl
On hyre lud to syng.
Iche libbe in lovelonginge
For semlokest of alle thynge,
Heo may me blisse bringe,
Icham in hire bandoun.
An hendy hap ichabbe yhent
Ichot from hevene it is me sent,
From alle wymmen my love is lent
Ant lyht on Alisoun.
On heu hire her is fayr ynoh,
Hire browe broune, hire eye blake;
With lossom chere he on me loh;
With middel smal ant wel ymake;
Bote he me wolle to hire take
For to buen hire owen make,
Long to lyven ichulle forsake
Ant feye fallen adoun,
An hendy hap ichabbe yhent
Ichot from hevene it is me sent,
From alle wymmen my love is lent
Ant lyht on Alisoun.
Nihtes when I wende and wake,
Forthi myn wonges waxeth won;
Levedi, al for thine sake
Longing is ylent me on.
In world his non so wyter mon
That al hire bounte telle con;
Hire swyre is whittore than swon,
Ant feyrest may in toune.
An hendy hap ichabbe yhent
Ichot from hevene it is me sent,
From alle wymmen my love is lent
Ant lyht on Alisoun.
